انهاردة جايبلكم قصة شاب ياعينى عاوز يشتغل ... بيدور على شغل
اتجنن
اتهبل
اتهطل
فاكرها سايبة
قال شغل قال
المهم نشووووووووووف .......... سيد حنبولة هيعمل ايه
سيد حنبولة ... شاب مصرى مكافح .... فى العقد التانى من عمره ... من يوم ما اتولد مامسكش فى ايده عشرين جنيه على بعض ... نموزج حى لكلمة ( نحس ) ( فقرى ) ... بس اما كبر ولقى العمر ممكن يعدى بيه ... فكر انه لازم يشتغل ويكون له هدف .. وفعلا بدأ رحلة الشقاء فى البحث عن فضيحة ... قصدى ( البحث عن عمل )
راح اخينا سيد وأول ما راح لفرن عيش ... دخل لصاحبها وقال .. سلام عليكم قاله وعليكم السلام قاله سيد .. ممكن الاقى شغل عندك ... انا محتاج للشغل اوى علشان اقدر اعيش ... بصله المعلم صاحب الفرن كده من فوق لتحت وقاله ... تشتغل على ( طاولة ) ...؟؟
رد سيد وقاله ... يعنى ايه طاولة ... قاله طاولة العيش اللى بيبقى فيها العيش لسه عجين ... انت شغلتك توصل الطاولة دى للراجل اللى واقف على الفرن .... موافق ....؟؟؟
بص سيد كده وهو متردد .... وقال ... طيب ممكن اعرف هتدينى كام يا معلم ... قاله هديك 15 جنيه فى اليوم والشغل 8 ساعات .... فكر حسين شوية وقال فى عقل باله ... يا واد يا سيد 15 جنيه مش وحشين ... واهو نلاقى قرش نجيب بيه الاكل حتى ... قاله موافق يا معلم ... قاله المعلم ... طيب بكره الصبح الساعة 6 تكون هنا واوعى تتاخر .. قاله حاضر يا معلم .....!!
وفعلا جه تانى يوم الساعة 5.30 بس لقى الفرن لسه قافلة .... قال استنى حد ما يفتحوا .. قعد مستنى لحد لساعة 6.30 مفيش حد جه ... لحد 7.30 ولا حس ولا خبر ....!!
لحد ما راح لبقال قدام الفرن ساله ليه الفرن ما فتحتش لحد دلوقتى ... رد عليه الراجل وقاله .... بتوع التموين جم امبارح وقفلوا الفرن عشان مخالفة وزن رغيف العيش ...!!
قعد اخينا سيد فى الارض وقال ... يعنى رضينا بالهم والهم مش راضى بينا ...
المهم قام سيد وقال لازم اشوف اى مكان تانى ... وفعلا راح سيد المرة لــ........!!
(ميكروباص ) وقال للسواق ... تشغلنى معاك ياسطى .. قاله تشتغل معايا .. تشتغل ايه ... انت بتعرف تسوق ... قاله لا بعرف انادى ... قاله ااااااااااه ... تباع يعنى ... قاله ايوااااا ... تباع ... قاله والله حظك حلو انا التباع بتاعى سافر البلد من يومين .. وكنت بدور على تباع ... قاله سيد ... وانا تحت امرك .. نبتدى من امتى ... قاله السواق ... اركب دلوقتى لو فاضى ... فرح اخينا سيد وقاله ماشى ياسطى ... بس سكت شوية سيد وقال .. اسطى ... ممكن اعرف هتدينى كام ... قاله انت لحقت تشتغل وبتدور على اليومية ... لما نخلص الوردية انا هراضيك ... بص له سيد وقاله .. تحت امرك ياسطى ... وفعلا بدأ سيد الشغل ... ( بولاق كوبرى خشب بولاق بولاق ) قعد ينادى لحد ما حسه راح .. لحد ما فى مرة من المرات وهما رايحن ( بولاق ) لقى لجنة مرور ... وقفت السواق ... سالته على الرخص ... طلع ماعهوش رخص ... بس مش دى المشكلة .. المشكلة انه كان شايل معاه حتة ( حشيش ) اتمسك بيها وخدوه هو وسى ( سيد ) للقسم ... وطبعا الروتين بتاعنا خللى سيد يبات فى القسم 24 ساعة لحد ما افرجوا عنه تانى يوم ... وعرفوا انه مالوش اى علاقة بالحشيش ده ... خرج سيد من القسم .. وهو ( ميت ) من الجوع .. بقالة اكتر من 30 ساعة ماكلش ... كان كل همه انه يلاقى بس لقمة كده يسد بيها جوعه ... وهو ماشى ىلقى واحد بتاع ( بطاطا ) ... اتردد سيد ... هيروح يقوله ايه بس ... ماعهوش فلوس ... بس الراجل باين عليه ابن حلال .. وممكن يديله حتة بس يسد بيها جوعه ... فعلا راح اخينا سيد لبتاع البطاطا .. سلام عليكم يا حج ... سلام ورحمة وبركاته ... أأمرنى يابنى ... الامر لله يا حج ... انا جعان اوى وماعييش فلوس ... ممكن بس اى حتة اسد بيها جوعى ... ضحك الراجل وقاله ... لالا ... البطاطا مش هتنفعك ... انا معايا اكل باقى منى ممكن تاخده انا كده كده مش هاكل تانى الا لما اروح البيت ... مد الراجل ايدده فى جيب الجلابيه وطلع رغيفين عيش وحتة جبنة بيضة ... واداهم لسيد اللى ما صدق انه شاف اكل وراح واكل زى الاسد المفترس .... ونسى اصلا يشكر الراجل .. اللى سابه بياكل وبصله وضحك ومشى ... بعد ما خلص سيد وسد جوع بطنه قام وقال .. بسم الله .. توكلنا على الله ... نبتدى ندور تانى ... وفعلا راح المرة
دى لعجلاتى ... مانفعش ... راح لنجار ... منفعش ... الخ الخ ....!!
لحد ما قعد سيد فى الشارع .. بيبكى ويشكى حاله لله .... وفجــــــــــــــأة
بص لقى واحد واقف قدامه وبيقوله ... انت انكتبلك السعد يا سيد ... انت خلاص .. هتبقى من اصحاب الملايين ... قوم .... قوم خد ثروتك ... افتكر سيد انه اتجنن .. او انه مهيس من التعب .. مسح عينه كده وبص .. لا مش حلم .. ده فعلا فى واحد بيكلمه .. بس مش يمكن راجل مجنون ... او يمكن عاقل وبيتكلم بجد ... كل ده سيد بيكلم نفسه ... لحد ما نطق وقال .. انت مين وعاوز ايه .....!!
رد عليه الراجل الغريب وقاله .. بقولك انت انكتبلك السعد يا سيد ... قاله انا ... ازاى .. وامتى ... رد الراجل وقال ... هقولك على كل حاجة ......!!
انت ياسيد .... راجل طيب ... وقلبك طيب ... وانا كنت متابعك من زمان .. وعاوز اعرف هتعمل ايه فى الحياة وانت فقير وماعكش حتى حق الرغيف .. وبعد ما اتكدت انك نضيف وبتدور على لقمة بالحلال ... نويت انى اديلك نص ثروتى ... 5 مليون جنية ... ليه انت لوحدك يا سيد ... 5 مليون جنيه ... بتوعك انت وبس ... بص سيد وحاس انه بيحلم ... او انه اتجنن .. وسكت شوية وقال .. بتقول كام ... قاله 5 مليون جنيه ... ماصدقش سيد نفسه .. قعد يطنطط .. ويرقص ويصرخ ويجرى فى الشارع زى المجنون ... ويروح ويرجع يبوس فى الراجل ... لحد ما سمع صوت بيقول
Stooooop ....
بص للكاميرا يا سيد ... انت فى الكاميرا الخفية
بص سيد للكاميرا ... اللى نقلت تشيع جنازته على الهواء ... ودى نهاية كل واحد يفكر يدور على شغل فى البلد ............... ههههههههههههههههه
موضوع: حوش الي وقع منك 00منتدي ابن الدلتا 
الأربعاء يناير 13 2010, 20:20
