قال ايه معرفش يحبني

قال إيه...معرفش يحبني!!!

قال ايه معرفش يحبني Ca913663e38ae9d8fd2ee5ab4abe5deb98681637

أول لما اتقابلنا، أنا واثقة إني كنت بالنسبة له شخصية مختلفة تمامًا، ويمكن كنت في باله حد قوي أوي، ما بيتراجعش بسهولة عن قراراته!

ويمكن كان صعب الوصول ليا، حتى لو كان على سبيل الصداقة أو الإخوة!

يمكن كنت حد بيتعلم منه لغة حوار وتفكير جديدة، ماشفهاش قبل كده مع

أي بنت! يمكن كنت حد غريب عليه أول مرة يقابله!

يمكن حاجات كتييير، وكل الحاجات دي أنا بقولها من خلال كلامه وتلميحاته، من خلال تشتته وسؤاله الدائم: إنتي ليه مش عاوزة تتكلمي معايا خالص، ولا إخوة ولا صداقة ولا أي حاجة؟، مع إني ياما جاوبت على السؤال ده!!

مرة قال لي إنه كل مرة بيكلمني، بيتعلم منِّي درس جديد! لحد ما صارحني إنه عايز يتعرف عليا أكتر ويتقدم لي، وقتها كان قلبي فرحان جدًا، وقلت أخيرًا هقدر أعرفه إني بحبه، وطلبت منه يقول لماما، عشان أحس إن الموضوع جد.

وفعلاً قال لها، ومن بعد قراره ده، أنا ظهرت بشخصية مختلفة تمامًا وجديدة، لدرجة إني استغربت نفسي قوي!

اعذروني ما أنا أول مرة أحب، داريت عنه كتير إني بحبه، وكنت بهرب من صداقته لأني كنت خايفة أحب، وللأسف طلع خوفي في محله!

تخيلوا لما يجي يقول لي إنه في الفترة دي محبنيش! حاول بس فشل مع نفسه، ولمَّا يقول لي إنتي حد والله ما يتعوضش، أنا مش عايز أخسرك نهائيًا، إيه رأيك تكوني شريكة حياتي لكن بالصداقة، يعني نكون طول حياتنا مع بعض، بس كأصدقاء، وكل واحد ليه حياته!!!!

يا سلااااام!! مفكَّر بقى إني وقتها هقول له: "طب ما تحاول تاني"، وهو يقول لي: "أنا حاولت بجد ولاقيتك مختلفة عن بنات كتير كلمتهم، ده أنا حتى بفضفض معاكي وكأنك أكتر من أختي، وإنتي لازم تحترمي صراحتي، وتقدريها، وبعدين أنا كان ليا صاحبات برضه، كنت بكلمهم عادي، واتجوزوا دلوقتي، وفضلنا أصحاب!"

طب بالذمة دي تيجي يا جماعة إزاي؟ حد يستحمل يكون صديق طول العمر جنب حبيبه؟! وكمان مفكر إني أنا اللي معقّدة الأمور! واستغرب قوي وأنا بقول له إنت أناني! ورد عليا وقال لي: "إنتي غريبة أوي!!"

لكن هو ما يعرفش إني بقدر أحكِّم عقلي كويس، في الوقت اللي هحس فيه إن قلبي هيوقعني فيالغلط، أو وقت ما أحس إني ممكن أفقد كرامتي، وبقدر أخرج من ده كويس أوي، عشان ما أضعفش قدامه، حتى لو كنت هموت بعدها، ما يعرفش إني ممكن في لحظة أفتكر كل أخطائه الليسكتّ عليها، وأقدِّمها في الوقت المناسب، ابتديت أقول له إنه غلطان، بس ما كنتش بحاسب ولا بعاقب ولا بجرح، بقول له غلطه في صورة نصيحة يتعلم منها طول حياته، لأنه فعلاَ غِلِط فيا، ووجع قلبي جامد أوي، لما هو عارف من الأول إنه مش هيحبني.. قال لي ليه؟! ولما عرف أو حس إني بحبه.. ليه ما فكرش كويس وحاول يشوفني بطريقة تانية أفضل؟! ليه اتفق معايا اتفاق وهو اللي رجع فيه؟!ّ كان عايز يكلمني بأي طريقة وخلاص؟! كان عايز يثبت لنفسه غروره وبس ؟!

لا وكمان أنا اللي بجرحه ويا ريت ما أسيبهوش، وأرضى بالوضع الغلط ده!! ولكن أنا قلت مش هينفع أخسر كل حاجة، والمفروض إني ما أبكيش قصاده، ولا أضعف، وأطلع أنا الأقوى وأقول له "لا" أنا مش هكمل معاك، بس قبل ما أمشي إنت فيك وفيك وفيك وفيك، وبجد حاول تغيَّر من نفسك، قبل ما تقابل اللي هتخلي حياتك جحيم، أو تبقى أهلك يجبروك على جوازة مش على هواك، إنت أناني، وكلام من ده كتييييييييير، لحد تقريبًا ما بكى من جواه وكل ما بيضعف أنا كنت بقوى أكتر.

هو كان مفكر إن أنا كده بجرحه، بس بجد ده أقل واجب زى ما بيقولوا، كان نفسي وقتها أضربه بالقلم عشان أفوَّقه، بس للأسف مكنش واقف قدامي.

ومع ذلك لما قلت له: "نفتكر بعض بالخير"، كنت بموووووت، الله يسامحه، خلاني فارقت وأنا مش عايزة أفارق، وعيطت وأنا كان نفسي أفرح وأغني، بس بجد هو يستاهل كل قسوتي عليه، وعزائي الوحيد إني ما ضعفتش قصاده، وماشفش دموع عنيا.

كلامك قاسي

ربنا يوفقك