كوني قمر 14

.

النهارده هنعمل مع بعض ماسكات كتيرة أوي مناسبة لكل أنواع البشرة والشعر...

تابعونا

ماسك الترمس والردة لبشرة صافية
بنات كتير نفسها بشرتها تبقى صافية وناعمة وفيها نضارة، وماسك الترمس اللي هنعمله النهارده من أكتر الماسكات المفيدة للبشرة؛ لأنه بيديها نضارة ونعومة، وبيخلّيها رايقة جداً لكن مع المواظبة عليه، والماسك ده مناسب لكل أنواع البشرة سواء كانت بشرة الوجه أو الجسم.

وفيه قاعدة مهمة جداً في عالم التجميل؛ وهي إن الماسك اللي بيُستخدم للبشرة ينفع نستخدمه للجسم، لكن مش كل الماسكات اللي بنستخدمها للجسم ينفع إننا نستخدمه لبشرة الوجه.

وماسك الترمس بنستخدمه بعد الحمام أو بعد ما نغسل وشنا كويس أوي؛ لأنه بيحتاج لمسام مفتوحة.

ومكوّنات الماسك بسيطة جداً؛ وهي عبارة عن:
ملعقة كبيرة ترمس مطحون
ملعقة كبيرة ردة
ملعقة كبيرة عسل أبيض
1/2 ملعقة زيت ورد
مية ساخنة للعجن

الطريقة:
هنقلّب المكوّنات كلها مع بعض كويس، وبنعجنهم بمية سخنة علشان تفوّح ريحة زيت الورد، وكمان تفتت كل الحبيبات اللي موجودة في الماسك، ولازم أراعي إن العجينة تكون لينة ومتماسكة؛ علشان أقدر أفردها على البشرة بسهولة.

بعد كده بنبدأ نفرد الماسك على البشرة في الاتجاه من تحت لفوق علشان نفَتَّح مسام البشرة، وبنبدأ نضغط برفق على الحبوب الصغيرة الموجودة على بشرتنا، وطبعاً مابننساش منطقة الرقبة.

وبنسيب الماسك على بشرتنا لمدة من 20 دقيقة لساعة، وبعد كده نغسل وشنا كويس.

فيه حاجات كمان ممكن نعملها للبشرة اللي بيظهر عليها حبوب صغيرة؛ زي إننا نستخدم صابون بيحتوي على طمي البحر الميت، ونغسل به بشرتنا 3 مرات في اليوم في الشهر الأوّل، وممكن نعمل ماسك مكوّن من الزبادي والعسل ونقطتين عصير ليمون، ونسيبه على بشرتنا لمدة ساعة يومياً لمدة أسبوع، وبعد كده ممكن نعمله مرتين في الأسبوع


اللبن والليمون.. لشفايف نضرة
الشفايف من أكتر الحاجات اللي بتظهر جمالنا ونضارة بشرتنا، ولكل البنات اللي نفسها شفايفها تبقى نضرة وناعمة، فيه ماسكين كويسين أوي ممكن نعملهم...

الماسك الأول: عبارة عن خليط من الزبادي وعصير الليمون والعسل، وبنخلط الثلاثة مع بعض بمقادير متساوية.

الماسك الثاني: عبارة عن لبن، وعليه كام نقطة من عصير الليمون، وبندهن به شفايفنا يومياً.




صابون الأرز لتفتيح وتنعيم الجسم
دلوقتي هنعمل مع بعض صابون لتفتيح وتنعيم بشرة الجسم...

ومكونات الصابون ده عبارة عن:
بشر صابونة عادية من غير أي إضافات
فنجان مية صغير
ملعقة كبيرة أرز مصري مطحون
ملعقة كبيرة عسل
ملعقة صغيرة زيت لوز
ملعقة صغيرة زيت ورد

الطريقة:
بندوّب الصابون في المية على النار، لغاية ما الصابون يسيح تماماً، وبعد كده بنضيف عليه الأرز، ونقلب كويس لغاية ما المكونات تختلط كويس وتتجانس، وبعد كده نضيف العسل، ونقلب كويس، وبعدين نضيف زيت اللوز، وآخر حاجة هنضيفها هي زيت الورد، ولو حسينا إن الصابون جامد أوي ممكن نضيف شوية مية صغيرة، بس نراعي إن الصابون مايكونش جامد أوي ولا سايل أوي.

بعد ما نخلط المكوّنات دي كلها مع بعضها على النار، بنرفعها من على النار ونسيبها تبرد شوية، وهنلاقي إن قوامها بقى سميك، وممكن بعد كده إننا نشكّلها على شكل كور صغيرة أو نحطها في برطمان زجاج، ونشيلها في الثلاجة لمدة يوم، وبعد كده نطلّعها، ونحطها في الحمام، ونغسل بها جسمنا مع الحمام اليومي.

الجرجير والثوم وجوز الهند.. لشعر من غير مشاكل
بشرتنا لها امتداد لشعرنا، فعادةً اللي بشرته دهنية هيلاقي شعره دهني، واللي بشرته جافة هيلاقي شعره جاف.

ومن الحاجات المهمة جداً للعناية بالشعر هي نوعية الشامبو اللي بنستخدمه لشعرنا؛ يعني لازم نستخدم الشامبو المناسب لنوع شعرنا، بالإضافة إلى الماسكات الطبيعية، واللي بجد بتجيب نتيجة كويسة أوي، لكن بشرط المداومة والاستمرارية.

ودلوقتي هنعمل مع بعض حمام زيت هايل جداً لتغذية الشعر، ومنع التساقط، وعلاج القشرة، وإعطاء لمعان للشعر.

الماسك بيتكوّن من:
ملعقة كبيرة زيت جرجير
ملعقة كبيرة زيت ثوم
ملعقة كبيرة زيت جوز هند

والتركيبة دي لها فوايد كتيرة جداً زي ما قلنا؛ فمثلاً زيت الثوم بيغذّي الشعر، وبينبّته، وبيزيل القشرة، وزيت الجرجير بينبّت الشعر، ويقوّيه، وبيعالج التقصيف، أما زيت جوز الهند فبيساعد على إعطاء لمعان ونعومة الشعر.

وعلشان نعمل حمام الزيت بنتّبع الخطوات دي:
1- نغسل الشعر مرتين بالشامبو، ونعرّضه لكمية كبيرة من البخار، وإحنا في الحمام علشان المسام تتفتح.

2- هناخد الزيت ونحطه على جذور الشعر بس، وممكن ناخد منه نقطة أو اتنين نحطهم على باقي الشعر؛ لأن زيت الجرجير وزيت الثوم ما ينفعش نحطهم على الشعر.

3- بنسيب حمام الزيت ده على شعرنا لمدة 3 أو 4 ساعات، لكن مش أكتر من كده، وبعد كده نغسل شعرنا كويس بالشامبو.


وبكده يكون خلص عددنا النهارده...
وتابعونا في الحلقات اللي جاية...
علشان هنتكلّم عن العناية بالبشرة والشعر مع تغيُّر الفصول...
استنونا،،،