القطه العميا
عضو نشيط
الابراج : 
عدد المساهمات : 49
تاريخ الميلاد : 18/01/1989
تاريخ التسجيل : 30/07/2010
العمر : 35
 |  موضوع: فارس احلامي علي ايدك المحطه الجايه  الثلاثاء أكتوبر 19 2010, 09:55 | |
|
فارس أحلامي.. على إيدك المحطة الجاية
الحياة....تلك المتاهة التي نعيش فيها وننتقل عن طريق قطار يمشي على قضيب من الذكريات، بعضها سعيد وبعضها يجعلنا نبكي....في هذا القطار جميع الركاب في بحث مستمر عن ذلك الأمل الذي يجعلنا......إيه الكلام المجعلص ده؟!
باختصار عايزة أقول إننا دايمًا في توهان مستمر، و بندّور على حاجة تخلينا عايزين نكمل، حاجة تخلينا عايزين نتغيّر للأحسن والحاجة دي دايمًا بيكون ليها علاقة بالداء المهبب اللي اسمه الحب...ورغم عدم اقتناع بعض الناس بده، لكن لو فكرنا ثواني، هنلاقي إن الحب هو اللي بيدينا الدفعة عشان نكون أحسن....وأنا عن نفسي، بعلن ومن مكاني هذا، إن الحب هو اللي هيخليني أحسن من أحسن حد في الدنيا....أيوه....هي دي الحقيقة....بس إزاي وفارس أحلامي عايش في غيبوبة عدم الاستقرار.....خلوني أحكي لكم شوية....
أنا بنوتة كل حلمي إن يبقى لي أجمل قصة حب...نتخانق ونتصالح...نتناقر ونغلّس على بعض...يقول لي وحشتيني وأتكسف....وكل الحاجات العظيمة دي....عايزة حبيبي يكون آخر وش أشوفه قبل ما أنام....وأصحى على صوته المزعج وهو بيقول لي: "قومي اعملي لي الفطاااااااار عايز أروح الشغل"....وبمنتهى الوقاحة أرد عليه مباشرة، من تحت اللحاف الفايبر المعتبر: "ما تروح تفطر عند مامتك إيه الغلاسة دي....؟" وبعدها تتحول المناقشة لحرب مخدات أو ماتش بوكس....مش مهم...المهم إننا في الآخر هنتصالح في لمح البصر، ونفضل نضحك، وبرضه هيروح يفطر عند مامته.....بس إزاي كل ده هيحصل...؟؟
إزاي هحقق أهم حلم في حياتي والأستاذ مش معايا....ليه مش معايا...؟؟؟ سؤال وجيه برضه....مش معايا عشان حاسس بعدم استقرار، وده كل اللي أنا أعرفه....طب ما تحكي لي...خليني أحس إني معاك...إني جنبك....مش عايزة أكون حبيبتك وإنت تمام ومبسوط بس....أنا عايزة أكون معاك دايمًا...لما تكون مش مستقر ولما تكون زعلان، ولما تكون متضايق....إحنا بنحب عشان نكون جنب بعض في الحلو وفي الوحش....نساعد بعض ونستحمل بعض...إنت محتاج لي زي ما أنا محتاجة لك....ما تعاندش....وجودنا مع بعض هيقوينا مش هيظلمنا زي ما إنت فاكر....ارحمني بقى وبلاش جنان، وبطّل الجملة "الفاكسة" بتاعة "مش عايز أظلمك معايا" أحسن بدأت أشك إنك عايز "تملص"!....لو حابب تخلع، قول....هتموت، بس ده ما يمنعش إنك لازم تقول....
إنت فارس أحلامي، بس قررت أقولك "على إيدك المحطة الجاية"....أيوه...نزلني من القطر ده...أنا قررت آخد موقف، وهقول لك بأسلوب شديد اللهجة، إني هبعد عنك....بحبك وبمووووت فيك آه، لكن هبعد عنك، عشان لازم تعرف قيمة حبنا في حياتك....هبعد عنك وأنا بتعذب وربي عالم، بس مفيش مفر....استنفدت معاك كل الطرق...يمكن بُعدي عنك يخليك تعرف أنا أد إيه بحبك....بس لو الطريقة دي كمان ماجبتش نتيجة، مش هيكون عندي حل غير سم الفيران!
عايزة حبيبي اللي بيحضني بعنيه الحلوين لما بشوفه، يرجع لي تاني....يا واد دي عنيك فاضحاك...كلها حنيّة وحب وطيبة....ارحم نفسك بقى واعقل كده، عشان أنا قدرك المهبب...بحبك أوي والله..
| |
|
