شبيكوا لبيكوا احنا هننصب عليكوا
حاسس إنك لوحدك؟ حزين ومكتئب وجواك شعور بإن الحياة لونها إسود مخطط بكحلي متلون برمادي؟
بتسمع كتير أغنية "عيد ميلاد جرحي أنا"؟ بتشتري شمع ملون وتولعه يوم عيد ميلاد جرحك إنت وبعدين تقف تغني -مع الديابة الوحدانية- "الأيام الحلوة بتعدي في ثواني" ؟
عرفت "سوسن" وقالت لك إنها بتموت فيك وبعدين شفتها بعينيك -اللي أكلهم الدود- وهي خارجة حاطّة إيدها في جيب "سيد" صاحبك من جنينة الأورمان الساعة 6 بالليل رغم إنها بتقفل الساعة 5 -"الأورمان" مش "سوسن" !-..
والدك بيبص لك بصة بتحسسك بإنك "هريدي" ولد عمه اللي في الصعيد اللي هيطخه عيارين عشان ياخد بتاره؟.. والدتك دايما بتحط "ورك الفرخة" لأخوك الصغير رغم إنها عارفة إنك مش بتاكل حاجة في الفرخة إلا وركها؟
نفسك تركب أسانسير في بيتكم -اللي هو دورين بس- عشان تركبه مرة فيحصل فيه عطل فيقع بيك فتيجي لك كسور مضاعفة وتروح المستشفى فترتاح من كل الناس الوحشة دول؟
ماتترددش.. اتصل بينا على خط "الفضفضة فون "على رقم "000000000"
هنسمعك وهندلعك وهنشخلعك وهنحميك وهنلبسك وهنكسيك وهنطلعك زي الفل كأنك جوزين حمام بالفريك..
اتصل دلوقتي وفضفض معانا هتلاقينا كلنا بنسمعك.. اتصل بينا
على "........" نقول كمان الرقم
"........." نعيد كمان الرقم ".......... .." نزيد كمان الرقم "........." ممكن تسمع لنا الرقم "......." !
"لو كنت بتدوري على أقصر الطرق إلى شباب الجامعة، ونفسك تعرفي أسهل الطرق لقلب "هاني" و"تامر" و"لؤي" و"ياسر" و"رامي" و"حاتم" عشان "تأنتمي" مع كل واحد فيهم يوم في الأسبوع وتاخدي يوم الجمعة أجازة!
0000000000-اتصلي بينا على
لو كنت بتشعري بالحقد والغل والحسد تجاه صاحبتك "نورا" الجميلة الأمورة الحلوة ونفسك تعرفي طريقة تخليكِ زي القمر وأحلى منها مية مرة
0000000 اتصلي بينا علىلو شفتِ نفسك في المراية فحسيتِ بإنك بتتفرجي على فيلم رعب، ولو مشيتِ في شارع جامعة الدول العربية، فمافيش أي عربية وقفت لك، ولو ركبتِ أتوبيس زحمة فمافيش أي بني آدم طلع عنده ذوق قام وقعدك مكانه،
00000000 اتصلي بينا على
لو جربتِ كل أنواع الشامبو المستورد والمحلي، واستخدمتِ كل أنواع الزيوت من أول زيت "شل" لغاية زيت "التعاون" وفضل شعرك زي ما هو أنشف من الليفة وهي على الشجر وأخشن من الحجر وهو لسه على الجبل، اتصلي بينا على "........" خط
"ياختي فون"
للماكياج والجمال والموضة..
"ياختي فون".. هيروشك وهيأيفك وهيخليكِ أحلى بنات الكون وأرق من كل الكائنات البرمائية والزاحفة.. اتصلي الآن..
"مع ياختي فون.. هتخلي كل الشباب مجنون" !
متختخه وكل ما حد يشوفك يقولك دبدوبه التخينه ولا يهمك الحل عندنا اتصل هنتخنك اكتر بس اتصلي ب000حياتك بؤس ومش طايق نفسك قبل ما تنتحر اتصل ب 000
صاحبتك القديمه قلبتك..مراتك طلقتك..جوزك ضربك..اخوك ولع فيك ومش عارف تعمل ايه ؟؟اتصل ب 000
في التليفون فضفض متتكسفش
وبدات تتوغل في كل ارجاء حياه الانسان حتي الخصوصيه علاقتك الزوجيه مش كويسه الايام دي ليه بس كده اتصل ب000
زعلان مع مراتك لييييييييييه؟؟ يا راجل طلقها
لاالحل عندنا اتصل ب000
عايز تعرف حظك وحظ حبيبك وهتكملو مع بعض ولا
والطقس ايه حر برد رعد برق عصافير اعاصير
( يارب تمطر عليكم ) اتصل ب 000
حياتك العاطفية فيها مشاكل ولا يهمك الحل مع 000
"أخي الفاضل وأختى الفاضلة.. ندرك مصاعب ومشاغل الحياة التي تعاني منها.. وندرك أنكم بكل تأكيد لديكم الكثير من التساؤلات التي لا تستطيع أن تبوح بها لأحد خوفا من أن يمثل هذا لكم حرجا أو يثير حولكم بعض من التساؤلات -اللي كده أو كده-..
اتصل بينا على ".......... ." ونحن في خط "الإيمان الصوتي" سنكون إلى جوارك -الجيم تنطق معطشة كما ينطقها أهل الخليج- وسنجيب عن كل أسئلتك -أخي الفاضل- الإيمانية، وسيتواصل معك -أخي الفاضل- نخبة من ألمع العلماء والشيوخ الذين يسهرون من أجل راحتك -أخي الفاضل- ويسعون دوما إلى معرفة كل ما هو جديد في عالم الفتوى حتى يقدمون لك -أخي الفاضل- آراء وفتوى تتماشى مع صحيح الدين..
معنا في "خط الإيمان الصوتي".. أنت في القلب.. بس اتصل الأول 000000000على
لو لاحظت هتلاقي إن الإعلانات دي اللي بتقدم خدمة مدفوعة الثمن
مقدما عبر الاتصال التليفوني بتركز على ثلاثة خطوط أساسية
"المشاكل العاطفية - الموضة والماكياج - الاستفسارات الدينية "
ده معناه أن الخطوط الثلاثة دول هم بالفعل أكثر الأشياء التي تشغل بال الشباب اللي هم عادة بيكونوا مستهدفين من الإعلانات دي..
الشباب.. حضراتنا يعني!
والسؤال اللولبي المحوري الجوهري هنا:
هل تثق في الخدمات والنصائح التي تقدم عبر خدمة تليفونية
مدفوعة الثمن؟
ويا ترى جربتها مرة أو مرتين أو عشرة قبل كده؟وكانت النتيجة إيه؟
وانا عايزة اعرف رايكم ايه بجد ف ظاهرة 000
ظاهرة ظهرت بكثرة كبيرة اوي وانتشرت بدرجة كبيرة جدا
طيب وهل هي فعلا بتحل كل مشاكل الناس وبتقدر تساعدهم ؟؟؟؟؟؟؟؟
ولا هو عبط وهلس بجد وناس بتلم فلوس م الهوا وخلاص
والمشكلة تلاقي ناس كتير اوي بتتصل وتصدق الكلام
هل بقي دي طيبة منهم ولا ال معاه قرش محير
يتصل ب 000 ويبخره
مستنية اجابتكم ع
موضوع: شبيكوا لبيكوا احنا هننصب عليكوا 
السبت يوليو 17 2010, 18:19
