حسنات بالملايين::وسيبك من الباقيين||حملة جديدة::أوعي تفوتك

بسم الله الرحمن الرحيم

عايز تكسب بجد
فعلا يعني وللا أنت غني
خليك معانا وان شاء الله هنكسب كلنا

طبعا مش هنكسب فلوس
ولكن هنكسب حاجة أغلي من الفلوس
هتكسب وهتكسبي معانا رضا ربنا سبحانه وتعالي

عايزين يا جماعة رضا ربنا وللا لا؟
طيب هل فكرتم في يوم انكم تخدموا دينكم بأي شئ
مش هقولك روح جاهد ولا روح استشهد ولكن عايزكم
تشاركوا معانا في الحملة دي وان شاء الله ثوابها فوق ما تتخيلوا؟

هل حبيت انك تكتب مواضيع وتنزل في المجلة والناس تعرف اسمك ةكل الناس تحملها؟
طيب؟هل فكرت في رضا ربك عن المواضيع دي
هل فكرت انك ممكن تكتب موضوع تضل بيه ناس كتير
ويكون كل شئ حرام هيعملوه بسببك في ميزان سيئاتك
أنا مش بخوفك بس أنا خايف عليك وعليكي انتي كمان
لأنكم اخواني في الله

زمان كنت بحلم يبقي عندي موقع وأحط عليه كل جديد والناس تحمل وكده
وبعدين جت مناسبة هزتني

عارفين هيا أيه؟وفاة أعز أصدقائي اللي كان ناوي يشترك معايا في الموقع ده
بجد أتأثرت جدا وأنا شايفهم بيدخلوه القبر وبيقفلوا عليه
وبعد كده الله أعلم بحاله
وكان كام سنة يا أخواني
19 سنة بس
معقول يموت صغير كده
للأسف الموت مبيعرفش صغير ولا كبير
ساعتها تخيلت نفسي مكانه وقلت ليه لا؟
ليه لا فعلا؟
هو مات وهو أضغر مني وأنا كنت أكبر منه بسنة
لو كنت مت في الوقت ده والسيئات بتاعتي شغالة أون لاين أربعة وعشرين ساعة
كان هيفيدني بأيه المال اللي هكسبة
بالله عليكم كانت الفلوس هتفيدني ساعتها؟
راجعت نفسي تاني وقلت لازم أرجع لربي وأنا عارف ان ربي غفور رحيم
خلاصة القول يا أخواني:لازم نخاف علي نفسنا
أكيد مهما عشنا هنموت ومهما تنعمنا هندخل القبور
وزي ما قلنا الموت ما بيعرفش صغير ولا كبير

لازم نخلي بالنا من كل حاجة بنعملها ونحكم فيها قلبنا قبل عقلنا
هل ربنا سبحانه وتعالي هيبقي راضي عني أنا بسمع أغاني
وانا بتفرج علي أفلام مليانة ألفاظ قذرة وممثلات نسيت تلبس
وتوقيع فيه صورة بنت أومغني بيبعتلي رصيد سيئات أون لاين كل ما حد يشوف توقيعي
وساعات كتير بقضيها في الوقوف في الجامعو أو الدروس مع البنات أو أبص علي دي ودي
أو في الشات بالساعات مع البنات وأنا مش واخد بالي ان ربنا شايفني شايف كل كلمة بقولها وكل ده متسجل عليا........وغيره كتيرررررررررررر

جه الوقت اللي تفكر فيه صح وتحاول تبقي صح
مقدرش أشوفك كده من غير ما أنصحك
بالله عليك أوعي تسيب نفسك كده
لازم تغير كل شئ مايرضيش ربك سبحانه وتعالي

وهقولك بقا علي حاجة تجيبلك حسنات بالملايين زي ما قلنا في البداية

النت ده تقدر من خلاله تبقي ملياردير بفضل الله
ملياردير حسنات

ازاي؟

تخيل وانت بتكتب موضوع اسلامي كل حرف بتكتبه بتاخد عليه ثواب

عايزك وانت بتكتب كل حرف تستشعر ثوابه عند ربنا وهو بفضل الله هيبقي كبير جدا

لو عضو واحد بس شاف موضوعك وقرأ كلامك

والله ثوابك عند ربنا كبير

والعكس صحيح تماما

لو حضرتك عامل موضوع ما يرضيش ربك سبحانه وتعالي

تخيل كده لو حضرتك حاطط اغنية في أي منتدي وياسلام بقا لو فيلم وطبعا أكيد اسم

حضرتك مكتوب علي الفيلم وهتبقي مشهور في المنتدي

بالله عليك شوف كام واحد هيحمل فيلمك أو أغنيتك وشوف كل واحد هيحملها

هيبقي لحضرتك سيئات زي كل واحد حمل الشئ اللي حضرتك رفعته

بالله عليك تقدر علي كده؟

تقدر تاخد سيئات علي سيئاتك؟ والله أبدا

ياريت نفكر بجد ونشوف هنستفيد أيه لما أرفع حاجة مش هستفيد منها أي شئ

بل بالعكس هتبعدني عن ربي سبحانه وتعالي

ايه المطلوب؟؟؟

أول حاجة تنشروا موضوع الحملة دي في كل المنتديات اللي تعرفوها ومشتركين فيها
وتضيفوا شعار وايميل الحملة في تواقيعكم
وبعد كده

المطلوب من حضرتك وحضرتك تشاركوا معانا في المنتدي الاسلامي

ازاي؟؟؟

لو حضرتك ليك في رفع فيديوهات وصوتيات وكده

يبقي تتفضل معانا تعمل مواضيع لأي شيخ تحبه

قرأن||فيديوهات||أناشيد

أي شئ من هذا القبيل وليك علينا ننشرلك موضوعك ده في المجلة

وكل الناس تشوفه وكل ده هيبقي في ميزان حسناتك ان شاء الله

ولو مش ليك في الرفع وكده يبقي تشارك في كتابة مواضيع في المنتدي الاسلامي

لو مش عارف يبقي تشارك بردود

وأستشعر انك لما هترد علي أي عضو يبقي حضرتك بتشجعه علي كتابة مواضيع أكتر وكمان

بتخلي أعضاء أكتر تشوف موضوعه ودا بردو هيبقي في ميزانك ان شاء الله

لانك كنت سبب ان موضوع معين يوصل للأعضاء ويشوفوه

لو حضرتك مشرف في أي منتدي او ليك علاقة مع صاحب أي منتدي أو موقع

يبقي حضرتك هتكلم صاحب المنتدي أو الموقع ده أو حتي لو مشرف يقدر يساعدك

وتنقل المواضيع اللي هنعملها عندهم في المنتدي وتخليهم يحطوها في المجلة

وعلي فكرة المواضيع هتبقي بدون أي حقوق يعني ممكن أي حد ينقلها

الهدف من المجلة ان ناس كتير تشوفها ويبقي ده في ميزاننا كلنا ان شاء الله

طيب لو مش ليك صله بأي حد

يبقي حضرتك تنقل المواضيع للمنتديات اللي انت مشارك فيها

ويبقي بكده بتساهم معانا في نشر المواضيع

ملحوظة::

كل المواضيع الفيديو أو الصوتيات هيتم رفعها بدون أي حقوق

يعني هنكتب اسم الشيخ وأسم الدرس أو كده

وده طبعا علشان الثواب

يبقي أي حد هيشارك معانا في الرفع مطلوب منه يلتزم بالتعليمات دي

ان الفيديوهات أو الصوتيات أو البرامج الاسلامية ما يبقاش عليها اسم أي منتدي

واللي يعمل الموضوع يكتب في أخره

حقوق النشر محفوظة لكل مسلم


نسأل الله العلي القدير أن يجعل هذا العمل خالصا لوجهه

وأن يجمعنا في الدنيا والأخرة علي طاعته

سبحانك اللهم وبحمده أشهد أن لا اله الا انت

أستغفرك وأتوب اليك