منتديات ابن الدلتا
عزيزي الزائر! سجلاتنا تفيد انك لست عضو لدينا في المنتدى,في حال رغبتم بالاِنضمام الى أسرتنا في المنتدى ينبغي عليكم التسجيل وان كنت عضو منتسب لدينا فعليك بالدخول
المدير العام
محمد شريف
منتديات ابن الدلتا
عزيزي الزائر! سجلاتنا تفيد انك لست عضو لدينا في المنتدى,في حال رغبتم بالاِنضمام الى أسرتنا في المنتدى ينبغي عليكم التسجيل وان كنت عضو منتسب لدينا فعليك بالدخول
المدير العام
محمد شريف
منتديات ابن الدلتا
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

 
الرئيسيةأحدث الصورالتسجيلدخول

 

 أاااااه لو تقبلنى يارب "كلام من القلب للقلب"3

اذهب الى الأسفل 
2 مشترك
كاتب الموضوعرسالة
هبه الحمزاوى
عضو جديد
عضو جديد



الابراج : الميزان
عدد المساهمات : 11
تاريخ الميلاد : 26/09/1989
تاريخ التسجيل : 27/09/2011
العمر : 34

أاااااه لو تقبلنى يارب "كلام من القلب للقلب"3 Empty
مُساهمةموضوع: أاااااه لو تقبلنى يارب "كلام من القلب للقلب"3   أاااااه لو تقبلنى يارب "كلام من القلب للقلب"3 Icon_minitimeالثلاثاء أكتوبر 04 2011, 05:59

السلام عليكم ورحمة الله وبركاته

كيف حالكم مع الله؟ ثم كيف حالكم مع انفسكم؟
ادعوا الله مخلصة ان تكونوا بخير

الان مع الجزء الثالث والاخير من سورة نوح
فكونوا معى أحبكم الله:

{ألم تروا كيف خلق سبع سماوات طباقاً}
ايه انتوا خلاص بقيتوا عايشين جسم بس من غير عقل
مش شايفين قدرته مش شايفين هو قادر اد ايه انتوا بتعاندوا مين بتبارزوا مين بالمعاصى والذنوب
مش شايفين السماوات اللى ربنا خلقها سبع سماوات كل واحده منفصلة على التانية
وكل واحدة لها سكانها زى مانتوا سكان الارض
خلق سبع سماوات واحدة فوق واحدة لا يمكن يصطدموا ببعض
معرضين عنه ليه انتوا مش حاسين بحاجة ده فى لحظة قال كونوا قردة خاسئين اتمسخوا قرود

{وَجَعَلَ الْقَمَرَ فِيهِنَّ نُورًا وَجَعَلَ الشَّمْسَ سِرَاجًا }
مش شايفين اياته فى الكون مسألتوش نفسكم ايه التعاقب المنظم ده ماخفتوش من القدرة دى لاتمحيكم،
ياجماعة احنا لما سمعنا عن القنابل الفسفورية اترعبنا لما شفنا اسلحة امريكا خفنا
لما بنشوف الغرب اكتشف شئ جديد او اخترعوا حاجة جديدة بنحترمهم ونتعلم منهم
طيب ما تيجوا نتأمل فى خلق الله واكيد بعدها هانحبه بجد
هانقربله بجد ماهو احنا لما نلاقى كل دى قدرة نبقى مجانين لو ما حبيناهوش
يا جماعة الاثار بتقول ان الحوت لما ابتلع سيدنا يونس لف بيه فى محيطات العالم كلها
ربنا وراه وسمعه تسبيح الحيتان والسمك والكائنات اللى فى البحار كلها

{وَاللَّهُ أَنْبَتَكُمْ مِنَ الْأَرْضِ نَبَاتًا*ثُمَّ يُعِيدُكُمْ فِيهَا وَيُخْرِجُكُمْ إِخْرَاجًا }
ربنا خلقنا من التراب وبعدين؟
هاننزل تانى تحت التراب تحت الطين القبر ماننساهوش يا جماعة هانندفن تحت الارض فى التراب ويتردم علينا بتراب
يعنى راجعين راجعين هانرجع للتراب تانى زى ماطلعنا من فى الاول
وبعدين هايطلعنا تانى هانطلع من التراب تانى بس المرة دى مش للدنيا مش للعمل بلا حساب
لا هانطلع لارض تانية خالص ارض حساب بلا عمل
يعنى ايه يعنى احنا مستنينا امتحانين امتحان لما نرجع تحت التراب اللى هو السؤال فى القبر
وامتحان تانى بعد مانطلع تانى مرة للارض الجديدة اللى هو حساب الساعة
تحت حر الشمس ادام نار جهنم سامعين شهيقها وزفيرها
عملنا ايه للامتحانين دول
عملنا ايه يا اخواتى عملنا ايه يا اباءى وامهاتى

{وَاللَّهُ جَعَلَ لَكُمُ الْأَرْضَ بِسَاطًا*لِتَسْلُكُوا مِنْهَا سُبُلًا فِجَاجًا}
ربنا سخرلنا الارض دى كلها عشان نعيش عيشة كريمة من غير نعم ربنا دى كان زماننا عايشين
زى الفيران فى الشقوق والجبال لولاه ماكنش بقى فيه طرق وبيوت وعمارات ومترو الانفاق وعربيات وطائرات
ايوة ما هو احنا من غيره ماكناش هانقدر نوصل لكل ده مكنش عقلنا المتواضع ده هايكتشف الاكتشافات ويخترع الاختراعات

نوح فى الايات كانه بيقول لربنا يارب بقالى 950 سنه بقولهم كلام وبدعوهم ليل ونهار وبقولهم ربنا كرمه كبير
كل اللى احنا عايشين فيه ده من كرمه ونعمه علينا
بقالى 950 سنه بحاول احسسهم بالنعم اللى انعمت عليهم بيها والنعم اللى حواليهم بس هما مش راضيين يارب
مش بيسمعونى يارب مش قابلين الكلام عنك يارب
زى البنت اللى ربنا يجازيها خير اللى تتخطب لشاب وتحاول معاه التزم الالتزام هو الطريق المنجى الوحيد
ساعد نفسك وساعدنى اساعدك يقولها معلش مش هاقدر انا عارف نفسى انا اخر واحد التزم او انصح الناس
ممكن بعد الجواز تقدرى تساعدينى وابقى كويس البيئة اللى انا فيها وحشة ما تساعدنيش
هو انت اصلا ساعدت نفسك عشان البيئة تساعدك ما انت عايش وعامل ودن من طين وودن من عجين زى مابيقولوا
ليه كده بتقفلها فى وشك ووشها ليه ماتسيبها تساعدك وتنجيك وتنجو بيك من جهنم
ونفس الحاجة مع الشاب اللى يخطب بنت ويقولها البسى النقاب تقوله لا بعد الجواز عايزة فرح وعايزة وعايزة
ماتنجى نفسك من النار وانت تفرحى اكبر فرح

{قَالَ نُوحٌ رَبِّ إِنَّهُمْ عَصَوْنِي وَاتَّبَعُوا مَنْ لَمْ يَزِدْهُ مَالُهُ وَوَلَدُهُ إِلَّا خَسَارًا*وَمَكَرُوا مَكْرًا كُبَّارًا}
نوح حاسس بمرار بيقوله رب انهم
طيب انهم دى ليه يانوح هو انت بتاكد لربنا ماهو عارف وعالم بكل شئ مش محتاج تاكدله
لا انهم دى خارجه عشان المرار اللى فى قلبه كانه بيقوله خلاص ضاعوا من اديا وخلاص
راحوا للنار برجلهم وسابونى وما قبلوش نصيحتى يارب تركوا طريقى وراح طريق جهنم يارب
اتبعوا طريق مهما كان اموال وبنين ونعم برضة نهايته خسارة نار جهنم يارب
اتحايلت عليهم عشان اساعدهم يعرفوك مارضوش ابدا يارب
قلوبهم حجر يارب قلوبهم صخر بعدوا عنك يارب هربوا من طريق النجاة يارب
رفضوا يارب يعبدوك لوحدك واختاروا يعبدوا الاصنام يارب
مارضوش يرحموا نفسهم من الشرك ويوحدوك يارب
توهوا الناس يارب ومكروا بيهم
خدعوهم

{وَقَالُوا لَا تَذَرُنَّ آلِهَتَكُمْ وَلَا تَذَرُنَّ وَدًّا وَلَا سُوَاعًا وَلَا يَغُوثَ وَيَعُوقَ وَنَسْرًا}
ماتسيبوش الشرك وما تسيبوش الالهة زى اللى يقولك روح زور السيد البدوى والسيدة زينب والشيخ مش عارفه مين
انتوا بتتكلموا فى اولياء الله الصالحين؟
لا يا اخوتى احنا بنتكلم عن الشرك بالله
بنتكلم عن اخد وسطة بينك وبين ربنا

{وَقَدْ أَضَلُّوا كَثِيرًا وَلَا تَزِدِ الظَّالِمِينَ إِلَّا ضَلَالًا}
ضحكوا على نفسهم وضحكوا على بعض يارب
ضحكوا على ناس كتير يارب زى ما الغرب واليهود ما ضحكوا عالشباب كده بالموضة يارب
واقناعهم للناس بان الاسلام عادات ممكن تغييرها
ضحكوا عالناس يارب وخدعوهم
ضيعوهم يارب
الناس فى الشارع ماشية عندها غيبوبة كأنها متخدرة ومش راضية تفوق وكمان بتاخد جرعات زيادة

{مِمَّا خَطِيئَاتِهِمْ أُغْرِقُوا فَأُدْخِلُوا نَارًا فَلَمْ يَجِدُوا لَهُمْ مِنْ دُونِ اللَّهِ أَنْصَارًا}
غرقوا بمعاصيهم ربنا لما نزل عليهم المطر اللى ضيعهم كلهم مكنش ظلم لا ربنا لا يظلم احد
نزل عليهم المطر اللى اغرقهم لانهم عصوا الله واعرضوا عنه فضاعوا وما قدروش يحموا نفسهم ولا شركائهم قدروا يحموهم
غرقوا وما قدروش يعملوا حاجة
نوح قعد 950 سنة يزرع الشجر ولما يكبر يقطعه وياخد الخشب ويصنع السفينة
وكل ما يعدوا عليه يستهزءوا بيه ويسخروا منه مش مصدقين ان ربنا هايهلكهم بذنوبهم
وبذكر اسمه بس هاتجرى سفينة نوح وربنا يجعلها السبب فى نجاة اللى آمنوا معاه
نوح لما عملوا معاه كل ده قاله يارب انا مغلوب انصرنى ففى الوقت ده ربنا نصر عبده نوح ونصر اللى آمنوا معاه
ربنا نصر دينه وامر السماء تفتح ابوابها ونزل عليهم المطر المغرق
كل جزيئات الميه اللى كانت منتظرة الامر من ربنا عشان تنزل اخدت الامر ونزلت
السماء بقت بتصب ميه عليهم كانها مواسير ميه مفجورة والارض بقت كلها عيون بقت كلها بحار
خلاص الهلاك حل عليهم خلاص محدش هايقدر يعمل لنفسه حاجه الامر بإيد ربنا
خلاص معدش حاجه هاتنفعهم بيجروا والميه تجرى وراهم مش لقيين حته يصعدوا جبال ويهرولوا وبرضة المية وراهم
يقول تعالَى مما خطيئاتهم وقرئ خطاياهم أغرقوا أَي من كثرة ذنوبهم وعتوهم وإِصرارهم على كفرهم ومخالفتهم رسولهم
"أغرقوا فأدخلوا نارًا" أَي نقلوا من تيّار البِحار إِلَى حرارة النّار "فلم يجدوا لَهم من دون اللَّه أَنصارًا"
أَي لَم يكن لَهم معين ولَا مغيث ولَا مجير ينقذهم من عذاب اللَّه كقَوله تعالَى "لَا عاصم اليوم من أمر اللَّه إِلا من رحم".
لكن نوح اول ما بدأ المطر راح جمع المؤمنين واخدهم معاه فى السفينة وبدأت السفينة تجرى بيهم فى المية
وبدأ ابن نوح يحس بعد ما كان بيقوله هاروح لجبل يعصمنى من الماء وكان يتحايل عليه عشان يآمن يابنى اركب معنا
وهو يستهزئ بيه زى باقى الكفار
نفس الكلام اللى كل داعية صادق بيقوله للشباب اركبوا معانا سفينة النجاة ياشباب ما تحرقوش قلبنا عليكم ماتضيعوش نفسكم
يقولك خليك فى حالك انا حر مالكش فيه
لكن دلوقت المية خلاص هاتغرقه حاول يقوله الحقنى امنت معاك
لكن الموج حال بينهم معدش ينفع ايمانك مش هاقدر اعملك حاجه خلاص خلصت الحكاية وانت من المغرقين


{وَقَالَ نُوحٌ رَبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا*إِنَّكَ إِنْ تَذَرْهُمْ يُضِلُّوا عِبَادَكَ وَلَا يَلِدُوا إِلَّا فَاجِرًا كَفَّارًا }
نوح بيقول لربنا يارب انا عارفهم كويس دول لو عاشوا عالارض هايفضلوا يفسدوا فيها هايشركوا بيك برضة
والكلام ده خارج من خبرة نوح من كتر ما عاش فى وسط الناس دى عارف اد ايه هم قلبهم قاسى
يارب لو عاشوا مش هايجيبوا الا فاجرا باخلاقه واعماله كفاراً كافر قلبه
يارب الناس دى خلاص انتهت مش هاترجع

{رَبِّ اغْفِرْ لِي وَلِوَالِدَيَّ وَلِمَنْ دَخَلَ بَيْتِيَ مُؤْمِنًا وَلِلْمُؤْمِنِينَ وَالْمُؤْمِنَاتِ وَلَا تَزِدِ الظَّالِمِينَ إِلَّا تَبَارًا }
اخر ايه هنا وقف فيها نوح بعد ما انتهى المطر بامر الله واغرق الكافرين وقف نوح يكلم ربنا ويدعوه انه يغفر له
يااااااااه بعد 950 سنة دعوة مافترتش بتطلب من ربنا يغفرلك
واقف قلبه بيتقطع كانه بيقوله يارب انا عملت كل ده عشان تقبلنى وتغفرلى
اغفرلى يارب اقبلنى يارب
ولوالدىًّ لانهم ليهم اكبر فضل عليا
ولمن دخل بيتى مؤمناً ليه اصل اللى دخل بيت الداعية ده داخل عشان عايز يتربى ويتعلم عايز يمشى صح
وللمؤمنين والمؤمنات لا طلب المغفرة لكل مؤمن ومؤمنة بحسنه
يعنى ايه يعنى لما نقول اللهم اغفر للمؤمنين والمؤمنات بمليون ومئتين حسنه ايوة بعدد المؤمنين فى العالم

وبهذا نكون قد انهينا الجزء الثالث والاخير من الدرس
انتظرونى ودرس جديد غداً إن شاء الله

سبحانك اللهم وبحمدك أشهد ان لا إله إلا أنت أستغفرك وأتوب اليك
والسلام عليكم ورحمة الله وبركاته
الرجوع الى أعلى الصفحة اذهب الى الأسفل
رحيق القلوب
مشرفة
مشرفة
رحيق القلوب


الابراج : الميزان
عدد المساهمات : 1113
تاريخ الميلاد : 06/10/1990
تاريخ التسجيل : 07/01/2010
العمر : 33
الموقع : منتدي ابن الدلتا
العمل/الترفيه : الانترنت

أاااااه لو تقبلنى يارب "كلام من القلب للقلب"3 Empty
مُساهمةموضوع: رد: أاااااه لو تقبلنى يارب "كلام من القلب للقلب"3   أاااااه لو تقبلنى يارب "كلام من القلب للقلب"3 Icon_minitimeالأربعاء أكتوبر 05 2011, 21:06

اللهم بارك فيكي ونفع بكي المسلمين
الرجوع الى أعلى الصفحة اذهب الى الأسفل
 
أاااااه لو تقبلنى يارب "كلام من القلب للقلب"3
الرجوع الى أعلى الصفحة 
صفحة 1 من اصل 1
 مواضيع مماثلة
-
» أاااااه لو تقبلنى يارب "كلام من القلب للقلب"
» أاااااه لو تقبلنى يارب "كلام من القلب للقلب"2
» نفسى أوصلك يارب"كلام من القلب للقلب"
» نفسى أوصلك يارب"كلام من القلب للقلب"2
» نفسى أوصلك يارب"كلام من القلب للقلب"3

صلاحيات هذا المنتدى:لاتستطيع الرد على المواضيع في هذا المنتدى
منتديات ابن الدلتا :: المنتديات الاسلامية :: المقالات الاسلامية والمقالات-
انتقل الى: