شكرا سياده الرئيس لانك جعلتنا نحب بعضنا

اكيد كلنا شفنا وسمعنا وفي مننا كمان عاصر اللي حصل
وانا كنت واحدة منهم وبقول كدة وانا فخورة جدا بأبناء وبنات شعبي اللي وقت الجد حسيت وكاني اول مرة اشوف مصريين في حياتي
ناس ماشية محترمة جدا ولا حد بيسرق حد ولا حد بيعاكس حد ولا حد بيتحرش بحد الناس ماشية في نظام جدا وبمنتهى الاحترام والرقي اللي قلما لمسته في المصريين
شيء جميل اني ابقى نايمة في بيتي واسمع جرس الباب ولما اروح افتح الاقي شريف جارنا شاب 23 سنة ولما أساله خير ..... ؟!!!
يقولي لا مفيش بس بطمن عليكي أنتي وطنط عشان عارفين ان محمود أخوكي مسافر ياريت تقفلي الباب كويس ورايا ولو عندك أي حاجة إزاز حطيها في البلكونة , ولما أروح أقف في البلكونة بيصعب عليا منظرهم وهما مولعين في الخشب عشان يتدفوا بيه وفي أيد كل واحد فيهم عصاية أو سكينة أو أي سلاح يحموا بيه بيوتهم وجيرانهم وشوارعهم ... حقيقي حاجة تفرح
مش هنسى أبدا يوم السبت لما أصريت أني أنزل الشارع بحجة ما خلقتها لوالدتي ولما لقيت مسيرة ماشية قدام قسم الرمل اترعبت بالاضافة لمنظر القسم وهو محروق اللي زادني رعبا
وانا ببص حواليا بدور على تاكسي يروحني لقيت شاب من منظمي المرور ماسك إيد واحدة كبيرة في السن بيعديها الشارع , ولما عدى بيها الشارع بسأله على المظاهرة قالي متخافيش دي مظاهرة سلمية وسألني عايزة تروحي فين ولما قولتله وقفلي تاكسي أخيرا وعرفت أروح بيتنا وانا بسأل نفسي
احنا الكام يوم اللي عيشناهم دول كانوا فعلا في مصر ؟!!!
ووصلت لاجابة على لافتة رفعها أحد المتظاهرين في ميدان التحرير عليها
" شكرا حسني مبارك لأنك جعلتنا نحب بعضنا "

NO COMMENT YA MAY

هى دى مصر
وهو ده شعب مصر الطيب الشجاع

اللهم احفظ بلدنا مصر
اللهم احفظ شعب مصر

جميل جدا تسلم ايدك