صرخه فتاه مصريه _ عاوزه اتجوز 00000000

[b]صباح \ مساء الخير

من غير سلام ولا كلام حاسة انكم بتقولو بينكم وبين نفسكم هى بينكى جرالها ايه اتهبلت ع غفلة

مش هريحكم خليكم مصدومين كده شكلكم حلو
يلا نبتدى وهتفهموا لوحدكم

سموا كده و خليكوا معايا واحدة واحدة خلينا
نتفق الأول ان موضوع الجواز و العرسان و تأخر الجواز ده
موضوع حساس جدا وصعب جدا انكوا تلاقوا حد بيتكلم فيه بصراحة..خصوصا بالنسبة للبنات

لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش يا إما على انها مسروعة ع الجواز يا إما على انها بارت و مش لاقيه حد يتجوزها

عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه

انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش

أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية
"لما أحقق ذاتي ""...مش عارفه ايه ذاتها دي و تحققها ازاي يعني!!!

يمكن فيه بنات كتير ليهم طموح في دراستهم و في شغلهم
لكن أتحدي ان أي واحدة فيهم مايكونش طموحها الأول انها تبقى زوجه
على الأقل لأن دي الطريقة الوحيده اللي تخليها تبقى أم

نتفق بقه على أسس تانية مهمة ....عدد البنات في مصر أكبر من عدد الرجاله

دي نقطة أساسية مش عايزة أي حد يناقشني فيها و سيبوكوا بقه من إحصائيات الحكومة اللي بتقولك عدد الإتنين زي بعض

لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45

و هما لا يمكن يزودوها عن 38..أنا ليا واحد صاحب بابا قاللي ممنوع يزيعوا ان الحرارة فوق ال42
عشان السياحة ماتنضربش و السياح مايهربوش

موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم

موضوع الستات اللي بيقعدوا يخلفوا عشان يجيبوا الولد..
يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...

و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..

و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان ما علينا ده موضوع تاني

بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد
في كليتي مثلا كانوا تلتين العدد بنات و التلت ولاد ..يعني الضعف

نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب )

و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم

الله يخرب بيوتكم طب بص لنفسك يا خويا في المرايه الأول طب بلاش بيقولوا الراجل مايعيبوش الا جيبه

طب شبرقنا كده و ادخل في ايدك انشالله علبة ملبس ..ألا لأ البعيد هو و امه يروحوا يشوفوا العروسة الغلبانه

اللي أهلها صارفين عليها الشئ الفلاني و مكلفين قعدة التعارف دي شئ و شويات رايحين إيد ورا و إيد قدام

و البت مافيهاش أي عيب و يقولولكم ..لأ أصلها مش شبه نيللي كريم قوي دي قالبه شوية على نجلاء فتحي و انا مابحبش النوع ده
تقولش حسين فهمي رايح يتقدم للبت

لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية

يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..

دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم

طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟
أنا مش طارق يا طنط و أنا متهيألي كده حضرتك مش خالتي ...صحيح؟
معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا

طبعا الواد يا إما بيطلع يجري ..يا إما حد من صحابه بياخد باله م الكمين
اللي وقع فيه ويجي ينقذه على أساس في حد عايزة و كده

طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات

و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو

و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات

الكلام ده كله على فكرة مش المفروض تضحكوا عليه..و الله البنات دول غلابة

زمان ما كانش مطلوب من أي بنت غير انها تحترم نفسها و تقعد في بيت أبوها
و تستنا العدل اللي بيكون في الغالب من إختيار أهلها

دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها
لأن مسؤلية إحضار عريس بقت ملقاه على عاتقها بالكامل

أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا
و م الجهة التانية المجتمع في حالات كتير و خصوصا خارج القاهرة و الأسكندرية
مابيرحمش أي بنت تخرج مع راجل

عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها
و يقولك عايز واحدة خام لا خرجت و لا اتكلمت مع حد غيري

طب بذمتكوا البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش

أنا شخصيا بدأت أحس اني هاعنس من أول ما كملت 23 سنة..طب نعمل ايه

بصراحة المجتمع المنيل اللي احنا عايشين فيه و اللي بيقيم البنت بجوازتها واللي تتجوز بسرعة تبقة شاطرة

واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها

و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة

المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها

خليكوا معايا بقه ..م المرة الجايه كل بوست هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه!!!!

ودى كانت نهاية مقدمة مسلسل
هينزلكم بمناسبة رمضان عبارة عن حلقة كل يوم
من كتاب عاااايزة اتجوز
بجد كتاب انا اول ما قريته مقدرتش اسيبه
كمية ضحك ومفاهيم الواحد طلع بيها رهيبة

يلا كفاية تشويق بقى[/b]

اخراج

pinky

ههههههههههههههههههه

الله يمسيكي يا هند صبري بالخير

عسل الممثلة دي وهتابع مسلسلها اكيييييييد

كنت هعمل توبيك زي الفكرة دي يا بينكوزتا ومستوحاه من المسلسل في نفس الموضوع بس من زاوية تانية .. انتي بقى جيبتيها من كتاب

جميل جميل

وكلام هايل بصراحة

والله ما اقدر اعلق حتى على حاجة من الكلام ده والتعليقات الكوميدية غير بشئ واحد

ان الزواج قسمة ونصيب

تسلم ايديكي بينكووو يا قمر .. ومتابعين معاكي الحلقات انتي وهند صبري

__________________

الحلقه الاولي

[b][b][size=25]الاول
[/b]


[/size]

حلو العنوان كده زي ماكان انور وجدي بيقول في "أمير الإنتقام"
أصل الموضوع كله أصلا تحس انه فيلم عربي ..بس اول موضوع ده كان فيلم هندي و كوميدي كمان

واحدة صاحبتي كانت لسه متجوزة قريب و كنت لسه حاضرة فرحها من أسبوعين

أتصلت بيا تطمن عليا يعني كنت لسه سامعه خبر ان واحده من أصحابنا جابت عريس لواحدة تانية صاحبتنا برضه

و ده موضوع يضايق قوي على فكرة يعني تفضل الواحده تقول و اشمعنى يعني ماختارتنيش أنا
و مش بعيد تقاطعها و ماتكلمهاش تاني أبدا

أنا بأه مسكت صاحبتي اللي كانت طالباني في التليفون و قعدت أرصلها شايفة الصحبات ؟

ماطلعش منك انت حاجه زي كده ..أمال مجوزينك ليه؟ مش عشان تشوفيلنا في اصحاب جوزك والا قرايبه حد ينفع

و كل شوية صاحبتي دي تحاول تقاطعني و تسدني و انا ابدا منطلقه زي الصاروخ

لحد ماراحت موقفاني بصرخه ..يابت اسكتي بأه جوزي بيسمع م السماعه التانية
و عايز يتأكد انك كويسة و رقيقة عشان جايبلك عريس

و في لحظه واحده انقلبت طريقة كلامي 180 درجه و بقيت أرق من أرق واحده تعرفوها

انتي صدقتي دانا كنت بهزر معاكي..انتي عارفاني رقيقة طول عمري دانا أرق م البت اللي طالعه جديد دي اللي اسمها منى زكي

و اسمع صوت جوزها يحاول يكتم ضحكة ع السماعة التانية و هي حساها بتجز على سنانها و هي بتقوللي عارفه عارفه هو انتي هتقوليلي!!

المهم اتفقنا على معاد..و لما اقول اتفقنا على معاد يمكن تعدي ع الرجاله سهلة كده يعني ديتها ايه؟

هيستحمى و هيخلي أمه تغسله القميص و البنطلون و أخته تكويهومله و يشغل كل اللي خلفوه عشان طلعة أهله البهية

لكن في بيت العروسة اللي هيا المفروض انا هيييصة ..غسيل للحيطان ..مسح للأرضية..تنضيف للسجاجيد ..تسييق للسلم..تلميع للكاسات ..تنضيف للستاير و الشبابيك

و بعد ده كله متوقع من العروسة بعد كل المجهود المقندل ده انها تتزوق و نخش عليهم حلوة و بتبرق .. مفهومه بتبرق دي ..
عموما البنات هيفهموا لأنهم عارفين موضوع بتبرق دي بتاخد مجهود أد ايه ...

المهم جه المحروس هو و أهله ..هو دكتور على فكرة ..باضرب بطرف عيني كده لقيته لابس لبس

يا سلاااام ..زي مايكون لم اللي ع الحبل كله و لبسه على بعضه ..

و تقريبا كده ماعندهمش مرايا و شكل أمه و أخته عندهم عمى ألوان..البيه لابس قميص أصفر .. بنطلون أزرق ..بلوفر أخضر ..

و فوق ده كله كرافته كده الصراحه مش عارفه أحدد بالظبط لونه إيه..لأ و استنوا ..
جزمة بني لما اتجعص كده و حط رجل على رجل بصيت لقيت الشراب نبيتي ...آه و النعمة

قلت في نفسي مش مشكله بيقولوا الراجل مايعيبوش الا جيبه ..
و أهو يبقى عريس تكني كلر زي التلفيزيون الملون ..مشرق كده و مقبل على الحياة...

هو صحيح ودانه مخاصمه راسه خالص و سنانه بيحبوا بعضهم جدا لدرجة انهم راكبين فوق بعضيهم ..بس خلقة ربنا يعني ..المهم العقل و الشخصية

أول ما بابا دخل راح واقف ..حلو مؤدب يعني و انطلقت امه تعرفه زي مانكون في برنامج

الدكتور سامي ..علاج طبيعي ..قام هو مكمل التقديم و قايل ...وبقلد فنانين....إيه الهبل ده بأااااه ..هو احنا عاملين برنامج مواهب و الا ده جاي يعمل انترفيو في كبارية

بابا برقله كده و قاله آه أهلا و سهلا اتفضلوا و بص لماما بصه معناها إيه اللي انتوا جايبينه ده؟

أنا قاعده و ماسكه نفسي م الضحك و ده منطلق بيتكلم على صولاته و جولاته في عالم التقليد و احنا قاعدين نبص لبعض و امه شكلها منشكح أوي من كلامه

و فجأة بص في الساعة و بص لبابا ..بابا خاف ليطلبني دلوقت و هيبقى موقف محرج أول مرة يتعرضله..لكن ده قاله ..عمي ممكن أسألك حضرتك سؤال و تجاوبني بصراحة؟

بابا قاله بخوف كده خير يا بني؟..قاله هو التلفزيون ده شغال ؟..بابا فوجئ كده و قالله آه يابني شغال ..فجأه الحليوة ده

راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين
و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار بن كلب ...واحنا قاعدين ..



ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص
( الكلمة دى جات على كرامتى انا بينكى هانم اوى )

الواد فجأة سكت و لف كده لماما بالتصوير البطئ..و عينيهلاااااا ..بقولك ايييييه ..إلا الزمااالك ..اتكلمي براحتك على أي حد

على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك
بيتهان فيهاحمرت لدرجة ان ماما كشت في مكانها ..و ده راح رافع الجعورة ..

يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟

كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي
و بعدين وقعت ع الأرض من كتر الضحك..هم يبكي و هم يضحك

الجميل بأه ان صاحبتي جايه تاني يوم تسألني على رأيي قولتلها لأ طبعا انتي بتستهبلي ..
و حكيتلها ع اللي حصل..لقيتها بتقول طب و ايه يعني؟
عادي ماتبقيش بس تقوليله انك أهلاوية

و لما أصريت ع الرفض..صاحبتي دي قاطعتني و ما رفعتش عليا سماعة التليفون من يوميها
إزاي يعني أرفض عريس لقطة زي ده؟

صحيح إزاي؟

__________________

يا من اذا دعوناه وجدناه قريب
[center]نسالك ياالله يا ملاذ كل غريب

ان ترزقنا الحياة على خطى الحبيب

يا من اذا دعوناه وجدناه قريب

نشهدك ياالله ان نفتدى الحبيب

[center][center]فى القلب حب محمد اغلى من الولد

والمال والاوطان والاهل والبلد

اذا ما العمر هان لا يهم عندى

فالعمر فدى الحبيب

[/center]
[/center]
[/center]

[/b]

بينكوزتاااا القمر

هههههههههههههههههههههه

ضحكت اوىىى .. والله حلقة تمام

نااااايس اوىىىىى التوبيك ده

كله كوم والصاحبة اللي خاصمتك يا بينكوزتا

ما هو مش طبيعي يعني بردون تكسفيها وترفضي الاملة اللي هي جايباه

ههههههههههههه

متابعين يا قمرررررررررررررر

__________________

مشكورة بينكى على المجهود الرائع ده دمتى على هذا الابداع

تسلم ايدك بجد

بس هو ليه التشائم

اكيد النصيب بيجى حتى لوفين

ههههههههههههههههههه

شكلها هتولع نار

جميييييييييييل

بس فين باقي الحلقات

ارجوا الاهتمام

حتي لايحذف الموضوع